އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ޔުނާން ޕްރޮވިންޝަލް އެނަރޖީ އިންވެސްޓްމަންޓް ގްރޫޕް (ވައިއީއައިޖީ) ގެ މަތީ ފަންތީގެ ވަފުދަކާއެކު މިއަދު ބައްދަލުވުމެއް ބާއްވައިފިއެވެ.
މިއީ 9 ވަނަ ޗައިނާ-ސައުތު އޭޝިއާ އެކްސްޕޮޒިޝަންގައި ކުރެވުނު މަޝްވަރާތަކުގެ ދަށުން ވައިއީއައިޖީން ކުރައްވާ ދަތުރެކެވެ. މި ދަތުރުގެ މަޤުޞަދަކީ އިއާދަކުރަނިވި ހަކަތައިގެ ދާއިރާގައި އެއްބާރުލުން ވަރުގަދަކުރުމެވެ.
ޔުނާންގެ ހަކަތައިގެ އިސްތިރާޖާއި ބައިނަލްއަޤްވާމީ މަޝްރޫޢުތައް ހިންގާ ލީޑިންގ ކުންފުންޏެއް ކަމަށްވާ ވައިއީއައިޖީ އިން ވަނީ ރާއްޖޭގެ އިއާދަކުރަނިވި ހަކަތައިގެ މާކެޓުގެ އިބްތިދާއީ ތަހުލީލު މި ބައްދަލުވުމުގައި ހުށަހަޅައިދީފައެވެ.
އަދި މުސްތަޤުބަލުގައި އެއްބާރުލުން ދިނުމުގެ ފުރުޞަތުތަކާ ގުޅޭގޮތުންވެސް މި ބައްދަލުވުމުގައި މަޝްވަރާކުރައްވާފައިވެއެވެ.