ސްޕެޝަލް އިކޮނޮމިކް ޒޯންސް (އެސް.އީ.ޒެޑް) ގެ ޤާނޫނީ އޮނިގަނޑުގެ ދަށުން ހުއްދަ ދީފައިވާ އެންމެ ފުރަތަމަ “ސަސްޓެއިނަބަލް ޓައުންޝިޕް” ކަމަށްވާ “ޕްރޮޖެކްޓް އައިލާ” (Project AYLA) ގެ ބިންގާ އަޅައިފިއެވެ.
މިކަމަށްޓަކައި ބޭއްވި ރަސްމިއްޔާތެއްގައި މި ޕްރޮޖެކްޓްގެ ބިންގާ އަޅުއްވައިދެއްވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒެވެ.
ނ. އަތޮޅުގައި މިއަދު ބޭއްވުނު މި ރަސްމިއްޔާތުގައި ބޯޑް އޮފް އިންވެސްޓްމަންޓްސްގެ މެންބަރުންނާއި، ވަޒީރުންގެ މަޖިލީހުގެ މެންބަރުން، އަދި އަތޮޅަށް ނިސްބަތްވާ ރައްޔިތުންގެ މަޖިލީހުގެ މެންބަރުންގެ އިތުރުން ޑިޕްލޮމެޓިކް މަންދޫބުންނާއި، މަޝްރޫޢުގެ މައިގަނޑު އިންވެސްޓަރުންނާއި ޑިވެލޮޕަރުން ކަމަށްވާ ކްރިސްޓަލް ހޯލްޑިންގްސް ޕްރައިވެޓް ލިމިޓެޑާއި ބްލޫރޮކް ގްރޫޕުގެ އިސްވެރިން ބައިވެރިވެވަޑައިގެންނެވިއެވެ.
ޖުމްލަ އިންވެސްޓްމަންޓުގެ އަގު 790 މިލިއަން ޑޮލަރަށްވުރެ ބޮޑު މި މަޝްރޫޢަކީ، ރާއްޖޭގައި ޒަމާންވީ ފަތުރުވެރިކަމުގެ މޮޑެލްއިން ޑައިވަރސިފައިޑް ގޮތެއްގައި އަމިއްލަ ފަރާތަކުން ކުރާ އެންމެ ބޮޑު އިންވެސްޓްމަންޓެވެ. މި މަޝްރޫޢަކީ ލަގްޒަރީ ފަތުރުވެރިކަމާއި، ރެޒިޑެންޝަލް ޑިވެލޮޕްމަންޓުގެ އިތުރުން ދުނިޔޭގެ ފެންވަރުގެ ޞިއްޙީ ޚިދުމަތާއި، ފަތުރުވެރިކަމާބެހޭ ތަޢުލީމާއި، ޒަމާނީ ދަނޑުވެރިކަމުގެ ކޮމްޕޯނަންޓްސް ހިމެނޭގޮތަށް ތަރައްޤީކުރެވިގެންދާނެ މަޝްރޫޢެކެވެ.
މި މަޝްރޫޢުގެ އެންމެ މައިގަނޑު އެއް ސިފައަކީ، މުޅި ޓައުންޝިޕަށް ބޭނުންވާ ހަކަތައިގެ އެންމެ ދަށްވެގެން 60 އިންސައްތަ އިއާދަކުރަނިވި ވަސީލަތްތައް ބޭނުންކޮށްގެން އުފެއްދުމެވެ. ތިމާވެށްޓަށް ކުރާ ނޭދެވޭ އަސަރު ކުޑަކުރުމަށްޓަކައި ޒަމާނީ ކުނި މެނޭޖްކުރުމުގެ ނިޒާމުތަކާއި ފެނުގެ ނިޒާމުތައް ޓައުންޝިޕްގައި ޤާއިމުކުރެވޭނެއެވެ. މީގެ އިތުރުން މި މަޝްރޫޢުގެ ސަބަބުން ގިނަ ވަޒީފާގެ ފުރުޞަތުތައް އުފެދި، ރާއްޖޭގެ ހުނަރުވެރި މަސައްކަތްތެރިން ބިނާކުރުމަށްވެސް މަގުފަހިވެގެންދާނެއެވެ.
މިއަދުގެ ރަސްމިއްޔާތުގައި ވާހަކަފުޅު ދައްކަވަމުން ބޯޑް އޮފް އިންވެސްޓްމަންޓްސްގެ މުޤައްރިރުގެ މަޤާމުވެސް އަދާކުރައްވާ މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، މުޙައްމަދު ސަޢީދު ސިފަކުރެއްވި ގޮތުގައި މި މަޝްރޫޢަކީ ރައީސް ޑރ. މުޢިއްޒުގެ “ވިޝަން 2040” ގެ ދަށުން ރާއްޖޭގެ އިޤްތިޞާދު ސިންދަފާތުކުރުމަށް އެޅިގެންދާ މުހިންމު ފިޔަވަޅެކެވެ.
މި ރަސްމިއްޔާތުގައި ވާހަކަފުޅު ދައްކަވަމުން ޕްރޮޖެކްޓް އައިލާގެ ސީ.އީ.އޯ ޕެޓަރ ކަރސްޓިކް ވަނީ މަޝްރޫޢުގެ މަސައްކަތްތައް ކުރިއަށް ގެންދިއުމުގައި ސަރުކާރުގެ ފަރާތުން ދެއްވަމުން ގެންދަވާ އެއްބާރުލުމަށް ޝުކުރު އަދާކުރައްވާފައެވެ. އަދި އިޤްތިޞާދީ ވުޒާރާއާއި ބޯޑް އޮފް އިންވެސްޓްމަންޓުން ދެއްކެވި ނަމޫނާ އަކީ ބައިނަލްއަޤްވާމީ އިންވެސްޓަރުންނަށް ރާއްޖެއަކީ ފަހި ފުރުޞަތުތަކެއް އޮތް ޤައުމެއްކަން ރަމްޒުކޮށްދޭ ވަރުގަދަ ހެއްކެއްގެ ގޮތުގައި ޕެޓަރ ފާހަގަކުރެއްވިއެވެ.
މިނިސްޓަރ ސަޢީދު އިތުރަށް ބަޔާންކުރެއްވި ގޮތުގައި، ޕްރޮޖްކެޓް އައިލާއަކީ ސަރުކާރުގެ ރެޒިޑަންސީ އިންވެސްޓްމަންޓް ޕްރޮގްރާމާއިވެސް ގުޅިފައިވާ މަޝްރޫޢެއްގެ ގޮތުގައެވެ. މިގޮތުން މިނިސްޓަރ ވަނީ މުއްސަނދިންނަށް ރާއްޖެއަކީ އިންވެސްޓްކުރުމުގެ މުޤާބިލުގައި ދިގު މުއްދަތަކަށް އައިސް ހުރެލުމަށްވެސް އެންމެ އެކަށޭނަ މަންޒިލެއްގެ ގޮތުގައި ފައިތިލަ ސާބިތުކުރުމަށް ހުޅިވެގެންދާ ދޮރެއްގެ ގޮތުގައި އައިލާ ޕްރޮޖެކްޓް ސިފަކުރައްވައިފައެވެ. އަދި މިނިސްޓަރ ވިދާޅުވީ މިއީ ރިއަލް އެސްޓޭޓް ސިނާޢަތް އިތުރަށް ފުޅާވުމަށްވެސް އެޅޭ ހަރުދަނާ ފިޔަވަޅެއް ކަމަށެވެ.
ނ. އަތޮޅުގެ ދެކެނަންފަރާއި ދިގުފަރުގެ އިތުރުން ކުރަމާދޫ ހިމެނޭ ގޮތަށް ޒޯން ކަނޑައަޅާފައިވާ މި މަޝްރޫޢުގެ ބައެއް ނިމި ފަތުރުވެރިންނަށް ހުޅުވިގެންދާނެކަމަށް ބެލެވެނީ 2028 ވަނަ އަހަރުގެ ތެރޭގައެވެ.